正在加載......


售價 : $200
 臺江臺語文學季刊第32期:我上佮意的戲齣
 
  發行人:葉澤山
  總編輯:陳建成
  出版:臺南市政府文化局、財團法人臺南市文化基金會
  出版日期:民國108年11月5日
  ISSN:2227-748-X
  GPN:2010100888
  語言:繁體中文、臺語
  規格:平裝/23*17.3cm/253頁
  定價:NT$200元
 
 
 
 
|目錄|

 

001  舊城情調──記府城「水光燈影」

005  編輯手記──蹽落去,鬥陣為台語文學拍拚!/編輯部

 

008  城市的情韻 / 懷舊時刻──赤崁里老相片展覽/季青

010  傳說,龜山島/鄭如絜

012  春天佇西螺看著濁水溪/曾美滿

014  西拉雅的囝孫/盧品辰

016  逐家鬥陣蹽落去!──記2019府城台語月/莊啟倫

026  故鄉漸漸看袂著──王育德先生逃亡日本下關上岸/周華斌

030  《回鄉Huê-hiong》──王育德紀念館成立周年紀錄片/採訪報導葉書庭

032  人道ê精神,疼惜ê心情──王育德佮台灣籍原日本兵補償運動/陳正雄

046  回歸海洋台灣、島國本位,立法司法才具意義!──試論台灣國家語言平權佮復振/鄭邦鎮  台譯編輯部

 

059  我上佮意的戲齣 / 關於劇情的禱告/江穎

060  走揣雲洲大儒俠/王希成

062  凍頂烏龍/陳潔民

064  另外一種的生活思路:紅包場/程鉄翼

068  愛無生份/柳青亮

070  人生親像一齣戲/周梅春

072  咱佮病的距離/林美麗

080  攏是恆春的調/王耀東

084  吵愛/林月娥

090  囡仔時代的音響/賴朝和

094  耍水的記持/黃文俊

100  地動來相揣/陳金順

108  是親人抑是仇人?──韓國電影《逆倫王朝》內底ê爸囝情仇/顏銘俊

119  kan-na是一个計程車司機予咱ê啟示/Khóo Sè-lâm

124  寫予臺灣歌劇一張愛情批/林榮淑

 

現代詩

141  記持開始食餌--ah──詩寫外公陳tsue/柯柏榮

144  轉來潭仔墘/黃勁連

146  詩兩首:練習曲、告別──紀念葉博文/李勤岸

148  冬天過去,我著轉來/古能豪

150  史詩畫面──大安溪卓蘭大峽谷/黃徙

152  拋荒的情批/黃明峯

155  看大甲溪/余文欽

156  二仁溪中元夜吟/張信吉

158  人佮神/陳秀珍

159  簡單ê我/杜信龍

162  礁溪囡仔/林益彰

164  海洋的風/郭文玄

166  手尾捏詩/蘇善

167  寂寞月光/張威龍

168  幸福是啥物/楊鈺靜

170  我毋是孤單,猶有祢/高月員

171  拾荒/陳逸儒

172  海安路的紙箱城堡──佮2019台南街頭藝術節相搪/丁丁

 

人間的美食

173  虱目魚陵/謝惠珠

 

散文•小說

177  佇普悠瑪列車內面/呂美親

189  彼年熱天/小城綾子

 

評•論 / 發詩的城市

212  母語kap台南ê行踏,伊並無孤單/鄭清鴻

218  台江大海翁詩草蓊蓊──江山滿滿文本林(上)/胡民祥

230  《火種/Hué-tsíng》作品集自序──有夢,就有望/吳嘉芬

 

鄉野傳奇

238  姻緣使者──月老傳說/林桂鄉

 

講到太平洋

242  狗兄弟學台語佮畫圖/康原

246  「踅市場」的趣味/Ac Su

 

《台灣俚語小學堂》

250  青盲的毋驚槍/阿昆

 

252  徵稿啟事

254  版權頁

256  專題徵稿

 

因本期稿擠,連載的台譯文章《林宗義ê故事――化悲情為大愛ê人生路》暫停一期。

 
 
|書序|

 

編輯手記

 

蹽落去,鬥陣為台語文學拍拚!

 

編輯部

 

        面對世界文明發展愈來愈重視文化資產的潮流趨勢,先天基於歷史的淵源,後天出自公部門佮民間共同的努力,台南市政府佇語言文化藝術方面的推捒(sak),無論是出版抑是活動的規劃舉辦,一向攏是扮演台灣各縣市的「領頭羊」,好比台灣頭一本由公部門創辦發行的台語雜誌《臺江臺語文學》就是一个現成的例矣。今年,《國家語言發展法》通過,公共電視台語台成立開播,台南市政府文化局以前瞻的理念主動提出企劃,邀請公共電視台語台佮中華文化總會共同主辨「2019府城台語月――台語蹽落去(Tâi-gí liâu--lõh-khì)」的大型活動,再度成做全國首先以「語言文化」為主題所創辦的藝文系列活動,毋但(˜-nä)對台語文化的發揚有實質的幫贊,嘛真有時代意義。

        而且,後續的發展應該嘛充滿契機。因為語言佇咱的生活上無所不在,對去市場買菜、招呼人客、問路、看診、開講、收聽廣播到事務性的互動交流、朋友之間的交陪盤撋(puânn-nuá 交際應酬)、族群之間的認同、歸屬感、文學藝術的創作…等等攏包括在內,運用的層次親像擘(peh)洋蔥按呢有重重的內層佮深意,活動會當發揮的空間非常廣闊。

        所以,今年費心籌辦起一个頭,逐家鬥陣用心蹽落去,無定著(bô-tiänn-tiõh 說不定)這个以三百外年來一直佇台南在地活跳跳流通的語言為主題的規劃,會真自然迵(thàng 穿透)入民間各角頭,佮市民的生活微妙的共鳴,密切相敆(kap 接合),幾年後會成做台南上有代表性,全面展現出在地文化特色的城市慶典。

 

特稿佮專輯

        這期的內容相當豐富,有報導「2019府城台語月」活動的文章,有延續頂期「王育德紀念講座」系列文章,紹介王育德《歸鄉》周年紀錄片,佮以「人道ê精神,疼惜ê心情」發起台灣籍原日本兵補償運動,向日本政府請求補償的感人過程,嘛彙集近期間出版的台南作家台語作品集的推薦、導讀文章,抾(khioh 聚合)做伙規劃「發詩的城市」的專題,佮逐家分享作家群的榮耀和傑出的文采。

        當季的專輯《我上佮意的戲齣》有濟濟的來稿,銀幕上、舞台頂搬演的戲齣,佮現實中無劇本無排演的戲齣攏總有人書寫,有對布袋戲當中看人生,走揣雲洲大儒俠;有對囡仔疕(phí)就入迷,含情帶意寫一張予台灣歌劇的愛情批;韓劇浮頭,有人看甲一頭鑽入探討難分難解的爸囝情仇,嘛有人對照比較感慨台灣揣無轉型正義、大是大非;有追想著囡仔時代的音響、抑是耍水的記持,嘛有懷念紅包場時行的心適氣氛;有放眼南方山水,佮意著無仝的恆春調,嘛有徛佇簾簷跤旁觀,用感性的角度看序大人一路那吵那愛,相伴行過一世人……等等,有影是人生如戲,戲如人生。

        另外,這幾期前後有文友咧問,《城市的情韻》敢是長期的專輯?敢有開放接納台南以外的城市或者鄉里地方的詩文?佇遮先咱感謝逐家熱誠支持、賜稿,予單一的專輯會當不斷提升品質長期刊登,一方面簡單做一个說明,佇25期的編輯手記就有提起:「《城市的情韻》所掠的方向佮意象,設定佇人佮城市之間的互動,會當用各種角度來書寫家己所生活、熟似關心的所在,臺南也好,臺北也好,彰化屏東花蓮嘛攏各有伊的風韻;城市的歷史地理也好,人情世事也好,美食工藝嘛會當講甲飛天鑽地……」,咱一向無畫地自限,歡迎逐家來書寫各地的情韻,共同為台語文學開創美麗開闊的視野佮內涵。

        蹽落去,鬥陣為台語文學拍拚!


 
|內容試閱|

 

愛無生份

 

◎柳青亮

 

        佇我逐工出門去做工課的彼條路,會斡過工業區的出口,臺一線的路邊,油漆做草仔色、予人看著真有活力氣味的車牌仔跤,不時都看著一个蓋殕色的外套,穿有點仔破空的長褲、無穿鞋,共家己包甲袂輸潤餅𩛩kauh)的老阿伯仔,睏佇公車牌仔的長椅仔頂,一台舊舊閣生鉎的跤踏車後架,縛一綑算是伊依倚的包袱仔,恬恬陪佇伊睏眠的邊仔,彼台跤踏車,親像死忠的臺灣土狗,予這个阿伯仔有「伴」的感覺。

        我若經過遐的時,量約是早起時七點外,這个阿伯仔攏猶咧睏,逐工看伊共車牌仔跤當做眠床,久來嘛無感覺有啥物怪奇,干焦會臆伊是咱臺灣所界定的「遊民」爾。有這个憢疑心,到工課場了後,隨拍開電腦請Google解說啥物是「遊民」?

        原來佇遊民輔導法內底,共遊民分類做三項:第一、無人照顧、四界流浪、流落街頭一工以上,孤苦無依無倚的人。第二、無分日時暗時,睏佇公共場所抑是共人討食的人。第三、予人懷疑有精神障礙、四界賴賴趖無人照顧的人。照以上所分類的標準,我所看著的這个阿伯仔符合遊民定義的第一條佮第二條,伊是毋是有第三項的病症,我就毋知影矣。

        有時經過伊睏的所在,會看著透早出來運動的人,坐佇椅仔頂和阿伯仔開講,嘛捌看見生份人挔新被欲予伊蓋,毋過阿伯仔攏無共新被紮走,可見伊毋是一个痟貪的人,雖罔人送的新被較新較媠,毋過用慣勢的物件較合伊家己。

        今仔日我閣經過遐,拄斡過青紅燈跤的車牌仔,有一个老大人騎鐵馬停落來,無聲無說共兩包鹹餅囥佇遊民的跤踏車椅苴仔頂,無吵著伊的眠,遊民阿伯仔猶原睏佇椅仔頂,伊的美夢總是長長長,袂嫌車輛來來去去的車輪仔聲吵,嘛毋驚暗時的蠓仔叮佮凊冷的露水,上蓋了不起的是有一个袂驚人恥笑的遊民身份,恬恬仔睏,袂造成人的困擾,毋免去共人分,靜靜過伊的日子。

        人間上媠的是人佮人之間互相的關懷,這幕人間送愛的天使隨時會出現,咱毋甘看伊枵飢失頓,逐家自願對伊付出一點仔心意,無聲無說予伊做一个有尊嚴的人。


 


gotop