臺南市政府文化局出版品資訊網 -- 陳雷台語文學選
正在加載......


售價 : $200
 陳雷台語文學選
  
  作者:陳雷
  出版:台南縣立文化中心、台南縣文化局
  出版日期:民國84年11月初版、民國90年9月二刷
  ISBN:957-00-6375-0
  GPN:030749840297
  語言:繁體中文
  規格:平裝/20.5*13.3cm/262頁
  定價:NT$200元
 
 
 
 
 
 
|內容簡介|


        陳雷從小在臺南長大,醫學院畢業後去了美國並在加拿大開業。即使久居異地,故鄉的語言仍在腦海中不曾忘記,陳雷一生中僅少數英文創作,絕大多數作品都為臺語,創作皆為臺語文學。這本〈陳雷台語文學選〉收錄了從1986到1994年的作品,也看出作者對臺語深切的愛與用心。
 
 
|作者簡介|

 
陳雷
 
        本名吳景裕,台南縣麻豆人。1939年出世,giń a時代大部分tī台南市大漢。1957年省立台南第一中學畢業,1964年台灣大學醫學院醫科畢業,1965年去美國,tī University of Michigan(Ann Arbor. Michigan)作實習醫。了後去加拿大,完成University of Toronto(Ontario)免疫學博士。1971—72年tī英國Clinical Research Center(Harrow, Middlesex)繼續免疫學研究。1973年起tī加拿大Ontario省作開業醫到tan
        陳雷tī1969年kap張明美小姐結婚,伊是1992年—93年加拿大台灣人教授專業協會副會長,也是加拿大台灣人權會會員,蕃藷詩社社員,〈台文通訊〉共同發行人。
        陳雷tī大學時代有寫中文新詩集〈神話〉(1962),〈仲夏的末了〉(1964–65)kap散文集〈在年青的夢幻裡〉(1963),1965年出國以後,繼續寫中文詩kap少數英文詩,英文小說。1982年至1985年用中文寫二二八事件長篇小說〈百家春〉(自由時代出版社,1988)。1986年寫〝台灣文學發展ê下一個階段〞kap台文短篇小說〝美麗ê樟腦林〞,以後除了少數早期政治論說文章以外,全部用漢羅合用方法台文寫作品。1989年到1991年間完成中篇小說〝李石頭ê古怪病〞,其他作品ê範圍有詩、小說、散文、戲劇kap有關台語文、kap政治論說ê文章,一部分收集ti〈永遠ê故鄉──陳雷台語文學選〉(旺文出版社,1994)。Chit má台南縣文化中心出版ê這本〈陳雷台語文學選〉,內容有包括陳雷按1986年到1994年期間真大部分ê作品。
 
  
|目錄|

 
縣長序──陳唐山
主任序──葉佳雄
編者序──黃勁連
作者序──陳雷
 
輯一/詩卷
002  夢
003  母語ê愛情
005  舊事
006  金山頂
 
輯二/散文卷
010  若是時間會倒轉去
012  未忘花
015  牽牛chīun殿
017  Basu頂ê革命
020  咱ê厝邊
023  凱西講gû
027  心事二三件
 
輯三/小說卷
030  救鞭
034  生kián發pōng
038  白菜博士
041  起siáu花
051  放送第四台
065  鳳凰起飛ê時陣
071  先生媽二戰林鳳嬌
084  草地chhōe牛
091  阿春無罪
099  poa̍h kiáu 出頭天
109  圖書館ê祕密
116  悲心
121  李石頭ê古怪病
 
輯四/短劇卷
210  La-li-oh廣播劇
 
輯五/論評卷
216  台灣文學發展ê下一個階段
218  台灣人對台灣母語ê錯覺
222  目前台語文學ê境界
224  漢羅合用法一致性ê問題
226  台文運動是啥物?為啥物?
229  錯誤ê大漢語文主義
233  國語家庭ê悲苦劇
236  按「洛神」看「台灣本位」ê心理建設
239  賴和文學ê精神
 
附錄
248  台灣話文的開拓及認同──鄭良偉
253  告別殖民地文學──羅文傑
259  笑kap目屎讀〈李石頭ê古怪病〉──陳明仁
 
 
|書序|

 
縣長序
 
台南縣  縣長  陳唐山
 
        真歡喜看着咱「台南縣立文化中心」卜出版六本《台語文學叢書》,這是咱台南縣官方出版兮頭一擺台語文學選集。逐家攏知,台南縣是一个農業縣,但是唔知影台南縣嘛是一个台語文運動兮大本營。因為咱遮有濟濟兮台文作家,唔管佇島內,也是佇國外就職、留學,兮心時時刻刻數念台灣即塊土地,唔敢放掉母語;
知影母語是根,根若是爛去,其他兮一切攏免講!尤其踮佇國外兮異鄉遊子,雖然無法度用母語隨心所欲暢談,但就用筆代替喙,寫出思鄉兮詩歌,寫出即塊土地兮點點滴滴。
        自從鄭成功登陸台灣以後,台語文佇台灣即塊島嶼生根,夠現在雖然換了三个朝代(清、日、中),但也佫咧流行,可見台語文兮表情達意,深受台灣儂兮疼惜佮堅持;只是因為環境兮無奈,無法度出頭天而已。即幾冬兮台灣儂已經覺醒,愛踏實、愛拍拚、愛有生命共同體兮認識,深深瞭解,愛用母語,愛疼惜家己兮文化,台灣則袂再度變成亞細亞兮孤兒。
        佇六十幾冬前,也就是一九二六年兮時陣,台灣文學之父賴和先生,就徛出來提倡鄉土文學,主張「喙舌佮筆尖合一」,提倡用台灣話語寫文章;紲落去,一九三年黃石輝、郭秋生兩位先生佫講明白:「只有使用台灣話語兮鄉土文學,則會當佮土地、民眾相結合,傳播佇社會各階層。」可惜即種偉大兮論調,佇日本儂兮統治下,那親像曇花一現──水是誠水,唔拘來得緊,也去得緊。
        現此時距離第一擺台語文運動已經過了一甲子,整個兮大環境,也有所改變,所以唔管大大細細,只有認同台灣即塊土地兮人士,攏想卜為台語文運動來「揭竿起義」,為「阿母兮話」盡一份力量。關心母語兮儂攏知影,台灣有誠濟縣市攏咧編印「母語教材」,校園小朋友兮喙內,除了「國語」以外,母語也出現佇大自然兮五線譜中,聽着有夠親切,有夠優美。
        台語兮水,包括詞句兮水、句讀兮水。表達心情「」,就用「鬱卒」;表現親情兮「愛嬌」,道用「saiN-naiN」。「近朱者赤,近墨者黑」,「赤」佮「黑」佇台語來講是押韻,但用「華語」讀,道無迄種押韻兮水。台語有八音,實在是七音,如果再加九个變調、兩个輕聲調;聲韻非常豐富,因此有儂阿咾台語,講伊是「詩兮語言」、「旋律性兮語言」。
        佇時代任務兮前提,即六本台語文學叢書兮出版,實在有伊深遠兮意義。向望以後會有濟濟兮文學作家,熱烈投入、參與台語文兮寫作,互台灣兮第二擺兮「台語文運動」,愈來愈成功。
 
 
 
主任序
 
台南縣立文化中心主任  葉佳雄
 
        民國三十四年台灣光復,政府為着貫徹族群之間兮和諧佮聯繫,大力提倡「國語運動」,幾十冬來,有夠成功;但是將「母語」拍落「冷宮」,一直夠解嚴之後,一寡有良知兮知識份子,發覺卜穩住族群兮根,一定愛唯「保存母語」着手,因為「母語若亡,文化若滅,族群自然而然被淘汰」,台灣平埔族是一个上好兮見證。唔但安呢,「母語」佫是親情交流兮工具;另外捌家己兮母語,嘛則會當了解家己文化兮結晶。
        確實,語言代表一个民族兮文化,因為「伊是一套有組織兮符號佮造句規則,卜互語言發揮作用,必須佇使用兮過程中,表現出明確性、一貫性佮普遍性。」由此嘛會當瞭解:語言佮族群文化兮成長,有誠密切兮關係,是袂使共磨滅兮。
        即幾冬來,「喙講父母話,手寫台灣文」,是咱即塊島嶼、上熱門兮話題;講「母語」蓋高尚,袂曉講母語上見笑。咱台南縣佇「提倡台語文運動」方面,出現濟濟推行者,唔但推行,佫將兮感受表現佇文字上,用「台文」寫小說、散文、詩歌......,真正無簡單!
        為着卜互濟濟兮儂,會當欣賞台語文兮水佮優美,本中心特別委託黃勁連先生策劃,邀請本縣籍兮台語文作家:胡民祥、李勤岸、陳雷、莊柏林、凃順從、黃勁連等六位先生,提供兮台文作品,出版咱台灣官方第一套純正兮台語文學作品集。佇母語教育,當咧推行兮今旦日,這六本台灣文學作品集兮出世,確實有伊大大兮使命。
        這六本台語文學集兮作者,攏是咱台南縣優秀兮台文作家:陳雷先生,伊是一个名醫,佇加拿大懸壺濟世之餘,不忘母語,同時不斷以台語寫作,創作台語文學。胡民祥先生,胡厝寮儂,現此時是美國兮工程師,雖然是讀理工兮,但伊兮台語詩佮散文,寫得真好佫有感情。莊柏林先生是大律師,也是法律教授,伊兮華文詩寫得真好;即幾年來,不斷發表台語詩,非常有深度。李勤岸先生是一位優秀兮英文老師,目前猶佫佇美國咧修語言學博士;李先生兮華文詩早早着真出名,為了台語明仔再兮發揚,不惜放棄教英文兮好頭路,千里迢迢去留學,精神可嘉。凃順從老師佇國民小學咧教册,伊是一位誠有成就兮篆刻家,也是一位誠優秀兮民俗家,佫是一位台文作家;伊有一首「走揣台灣儂兮血跡」兮台語詩,讀着互儂感慨萬千,甚至為台灣儂兮出世,流着歡喜兮珠淚。黃勁連先生,伊兮名聲真透;大學時代,是華語詩、華語散文兮高手,文學著作有幾何本;能編能寫,水準相當懸;即幾冬來,一心一意犁入去台語兮研究佮創作。
        最後我卜強調兮,提倡台語文,並唔是卜否定咱今旦日所咧推行兮「國語運動」,「國語」確實有伊存在的需要,但如果「國語」、「母語」二者同時並存,對族群兮文化、尊嚴,應該有正面意義。而且保存、維護佮使用母語,是即塊土地每一个儂兮權利也是義務呀!四十冬來,咱兮母語強強卜流失,實在誠需要咱用「喙」佮「筆」來搶救;今旦日無做,明仔再,道會後悔!唔知諸位先進有同感無?
 
 

編者序
 
/黃勁連/
 
        咱台南縣,自古文人共伊號作「南瀛」,會使講是咱台灣開發史,上蓋早、上蓋有氣質兮「文化地」。咱南瀛,山川壯麗,得天獨厚,有山佫有水,唔但有美麗兮山頭,佇雲霧中若隱若現;佫有婆娑兮海洋,抱着月光照落、平坦坦、白戌戌、彎來斡去兮海岸線(所謂「鹽分地帶風景線」是也)。不但有風光優美兮自然生態、田園景觀;地靈人傑、佫有非常優秀兮人文生態、文學景觀。咱南瀛,人才濟濟、出有傑出兮政治家、企業家、畫家、雕刻家、音樂家;同時文風鼎盛,出產真濟優秀兮文學家佮詩人。
        自從明朝尾仔,台灣文獻之祖沈光文先生,漂洋過海來夠今旦日兮善化,創設組立「東吟社」,開始台灣兮文雅風流;三百外年來,南瀛各庄頭,詩社林立,吟詠不斷,弦歌不輟。會使講是有井水、有人煙兮所在,道有儂咧吟詩作對;攏用台語來思考,用台語來作詩,用台語兮讀書音來唸、讀、吟唱古典兮詩文。以詩歌詠嘆咱兮土地,用歌詩來刻劃、描寫咱兮先民拍拚、奮鬥,流血流汗,拚命駛牛犁,來開發咱即塊土地。三百外冬來,南瀛兮古典文學,會使講是「五穀豐收」,有真豐富、真豐沛兮成績。
        佇現代文學方面,新化出身兮楊逵、張慶堂兮小說,鹽分地帶出身兮吳新榮、郭水潭、王登山、莊培初、徐清吉、林芳年、林清文兮現代詩,麻豆出身,風車詩社同仁林修二、關廟出身,嘛是風車詩社兮同仁李張瑞兮現代詩,成就真懸,佇台灣文壇頂面,有舉足輕重兮地位。戰後人才輩出,各領風騷,楊青矗、林佛兒、汪笨湖、林蒼鬱、小赫、黃武忠、蕭郎兮小說,莊柏林、羊子喬、鄭炯明、林仙龍、黃勁連、謝武彰、李勤岸、利玉芳、謝安通、吳夏暉兮現代詩,阿盛、周梅春、林佛兒、蔡碧娥、河洛兮散文,曾永義、胡民祥、吳鉤、林瑞明兮文學評論,黃文博、凃順從、陳益裕兮報導文學,金光閃閃,在台灣文壇攏佔有一席之地。
        佇台語文學方面,日據時代,1930年「台灣話文論戰」以後,吳新榮先生道開始試驗用台語來寫詩;伊有一首誠成功兮台語詩,叫作「故鄉兮輓歌」。紲落來,麻豆儂郭一舟(郭明琨),嘛開始思考以台語來創作現代白話文,伊有一篇寫了誠讚兮作品,叫作「北京雜記」,刊登佇1935年左右兮《台灣文藝》。新化儂楊逵,佇戰前着開始用台語咧寫劇本,戰後1948年,伊嘛有寫三首台語詩:「卻糞圾」、「卻垃圾」、「生活」,發表佇《台灣文學》。佳里興儂林清文,除了寫詩、寫散文以外,伊嘛用台語來做伊兮文學語言,編寫「廖添丁」、「歐劍明」兮新劇劇本。
        「蕃薯唔驚落塗爛」,戰後兮台語文學,枝葉代代澶,一時風起雲湧,百家爭鳴,台語文學佇咱南瀛得着真好兮發展佮成就。寫小說,亦寫詩兮陳雷,是麻豆儂;寫詩、寫散文、寫評論兮胡民祥,是善化胡厝寮儂;專心寫台語歌詩兮莊柏林律師,是學甲草坔儂;寫詩,亦寫散文兮黃勁連,是佳里佳里興儂;寫詩,兼研究語言學兮李勤岸,是新化儂;專心寫散文,有東時仔亦客串寫詩兮凃順從,是北門儂。六个儂兮台語文學作品,時常發表佇國內外報紙雜誌,得着誠好兮評論佮阿咾,佇台語文壇上替咱南瀛爭取𣍐少兮風彩。
        即次「台南縣立文化中心」,經過規年兮籌備、策劃,慎重卜來出版《南瀛台語文學叢書》,出版六个儂兮專集;這是台灣文壇兮大代誌,真正是「不朽兮盛事」。親像陳雷先生所講兮:「台南縣立文化中心」得着「頭彩」,佇台灣官方機構來出版「台語文學册」,頭一擺兮!佇遮,我卜來感謝陳唐山縣長、葉佳雄主任,感謝對台灣本土文學兮疼痛佮栽培。
 
1995年8月22日下晡
黃勁連佇佳里興
 
 
 
作者序──台南縣着頭彩
 
        台灣人ê鄉土文學按鄭溪泮、賴鐵羊、賴仁聲、賴和先生算起,到tan已經有六、七十年。Tī這個期間,咱台南縣作者ê著作,尤其是塩分地帶ê文學傳統,一直攏有真明顯ê地位。一方面因為台灣政治環境ê改變,咱鄉土文學ê內容kap方法mā toè leh變化,尤其是最近幾年以來,台語文學ê產生,會使講是一個真突出性、決定性ê發展。台灣文學ê實質開始一步進一步接近世界各地文學ê境界──母語文學。
        這回台南縣政府文化中心出版台南縣作家文學集,一方面是整理現此時台南縣作者ê文學作品,一方面是肯定這個母語文學ê新發展。這是全台灣各縣市中間着頭彩,放第一炮ê創舉,有值着咱大家大大來kā伊恭喜!我相信,台南縣作家文學集ê出版會增加chē chē人對目前台語文學發展ê注意kap認識。
        我beh深深感激總編輯黃勁連先生為出版這本册所用ê心神kap心意,也beh深深感謝台文通訊社替我所有ê原稿拍字兼校對,尤其hō我數念ê是這幾年來,chē chē有出名、沒出名ê台語文運動者kap讀者,ê理想主義kap工作,超出〝台灣錢im腳目〞ê社會,就是我心目中〝永遠ê故鄉〞ê模樣kap寫作靈感來源ê一部分。
 
陳雷    1994年10月
 
 


gotop