臺南市政府文化局出版品資訊網 -- 周成過台灣
正在加載......


售價 : $150
 周成過台灣
  
  編註:黃勁連
  出版:臺南縣文化局
  出版日期:民國90年8月
  ISBN:957-02-8780-2
  GPN:1009002613
  語言:繁體中文
  規格:平裝/20.8*13.8cm/201頁
  定價:NT$150元
 
 
 
 
 
 
 
|目錄|

 
001  周成過台灣
 
069  李三娘上水歌
 
 
|書序|

 
縣長序

/陳唐山/
 
        台語可以是一種語言,也可以是一種文學,在我們日常生活中,有太多從台語中所淬煉出來的雋語、歌詩、童謠、褒歌等等,代代相傳,形成生活中最生動的片語與最美麗的智慧。
        長期以來,台語只是一種語言,並未形成一種文學,坊間雖然出現過若干的「民間文學」,但多未經過系統整理與詮釋,充其量只是隨興式的拼湊編印而已,就文學角度觀之,實在不易看出它的功能與地位,殊為可惜。
        這些年來,台語文研究風氣,風起雲湧,百家爭鳴,民間文學形成一股風潮,並成為顯學。唐山自接任縣長之後,特別重視本土文學的推動,以強化本土藝術,愛惜斯土斯民。難得的是,台南縣文化局在葉局長的領軍之下,開官方風氣之先,於民國八十四年首度推出《南瀛台語文學叢書》一套六冊,將台語文學系統化、學術化,並予以重新詮釋與定位,使台語文學不只在這塊土地上生根,同時也推向國際文壇,一時廣受好評,許多大學、研究機構紛紛接上國際網路。 
        此次,再接再厲再度出版也是一套六冊的《南瀛台灣民間文學叢書》,整理台灣民間說唱七字仔歌仔簿,稽考文字,以全新面貌出現,為台語文運動再助一臂之力,使台語民間文學更上層樓,更接近廣大人民。讓更多人瞭解台語可以是通俗的,也可以是精緻的;可以是鄉土的,也可以是國際的。
        值此《南瀛台灣民間文學叢書》十二冊問世之際,除對縣立文化局葉局長與全體同仁的努力,肯定之外,同時也要對編者黃勁連的辛勞,表示感謝之意;台語民間文學的園地有這麼多人在一起耕耘,將來一定會五穀豐收,六畜興旺。
 
 
  
局長序

/葉佳雄/
 
        有井水、有儂煙兮所在,着有儂咧唸詩、唱歌;有儂兮所在,着有文學。這是誠自然兮代誌,那親像鳥仔佇樹枝頂,自然咧啼叫;草仔佇土地頂面,自然咧生長、生枝發葉。台語是一種古意、古典又佫幼秀兮文學語言;咱兮祖先,四百冬前着用台語兮前身──閩南語咧思考來唱歌、唸詩;不管作穡抑做工,唸褒歌來娛樂家己亦娛樂別儂。四百冬前,咱泉州兮老祖先着已經開始咧演劇搬戲,同時創造出「陳三五娘」南戲兮戲文;建立了台灣民間文學兮傳統基礎。
        台語兮古典文學,一脈相承,源遠流長;唯南戲戲文、南管兮散曲,夠北管兮文學,民間男女對唱兮七字仔褒歌,夠歌仔戲戲文,布袋戲、皮影戲戲文,超過壹仟三佰本兮歌仔簿,無法度計數兮民歌民謠,囡仔歌、囡仔古......會使講是山重水複,一山懸過一山;多采多姿,處處是柳暗花明兮好風景。這是台灣文學兮財產,唔是負債;做一位台灣作家應當愛來繼承、吸收,蓮花化身共伊發揚光大。
        民間文學兮特色着是口頭文學;台灣兮民間文學嘛是安爾:伊兮作者唔是有名有姓兮作家、詩人,是唔知姓名兮廣大人民逐家合力共同創作兮。伊口耳相傳、活佇廣大人民兮喙裡;在有情兮人間,在咱兮土地流浪,行過人間兮悲喜。後來經過文人兮採集、研究、稽考、修訂,共伊「文字化」;然後登佇報章雜誌,印佇冊裡;慢慢仔定型,繼續佇曠濶兮民間流行。那親像野草咧,充滿頑強野生兮力量;野火燒不盡,春風吹又生。
        台灣民間文學兮特色,是建立佇台灣語言兮特殊性格;着是古意、古典、文雅,着是樸素、簡潔、自然、生動;着是語彙兮丰富,以及可歌可唸,伊充沛兮音樂性;抑揚頓挫,那親像「大珠小珠落玉盤」。佫來着是意象性、伊形象化兮語言,營造多采多姿兮文學風景,來描寫台灣特殊兮風土人情;伊兮思想性,伊簡潔有力兮語言佇樸素兮文學形式裡,表露台灣儂兮人生觀,人生兮哲學,對大自然兮觀照,佮對人類社會兮批評。
        自古以來咱兮文人作家高高在上、𣍐咱兮民間文學;一般士大夫、讀冊儂嘛𣍐起咱兮民間文學。認定奚是販夫走卒、引車賣漿之徒兮雜唸亂唱兮文學,不登大雅之堂;真是互儂感覺遺憾。一九三六年李献璋出版"台灣民間文學集",台灣新文學之父賴和先佇頭前兮序文安爾講:「被士大夫排斥兮民間故事、歌謠,夠現在,猶會當在百姓喙裡咧流傳、唸唱;即款性命力兮拍畚,咱是唔敢看輕、凊彩共伊放過。啥乜原因咧,因為每一个故事抑歌謠,攏會當表現當時兮民情、風俗、政治、社會制度,亦會當表示當時民眾兮真實兮思想、感情;所以無論唯民俗學、文學,甚至唯語言學上看來,攏有伊保存兮價值。」早早着發出伊無奈兮感嘆,以及伊先知迄款獨到、利劍劍兮見解,互儂興奮,精神百倍,想卜振作起來追隨前輩兮跤步,繼續拍拚;關懷咱兮民間文學,更上一層樓,共咱兮民間文學,廣泛兮搜集、整理、研究;進一步共伊系統化、精緻化。同時用台語羅馬字共伊注音,用台語來共伊注解;希望咱兮民間文學會當普及化,重新行回民間,互咱兮民間逐家佫來喜愛。今旦日,咱「台南縣文化局」投入無法度計算兮時間、精力、財力,重新整理、編印《南瀛台灣民間文學》一套十二本着是即款兮心意。佇遮,我卜代表「文化局」來向黃勁連、不眠不休兮努力,表示敬佩、感謝之意。即款幼秀兮台灣民間文學兮系統化出版,希望那像海湧咧;一湧接一湧,接紲來出版。
 
 
 
編者序

/黃勁連/
 
        台灣兮民間文學,實際上着是台語文學,亦着是用台語來思考,描寫台灣兮人、事、物,記錄台灣兮風土、民情,表現台灣儂兮生活經驗,思想、感情兮世界兮文學。唯台語兮民間文學,咱會當看着台灣儂兮歡喜抑是悲哀;咱會當偷偷仔看着台灣儂兮形象佮伊心內兮夢。
        台語是文學性、音樂性兮語言,伊有八音七調,九个變調,伊古老、古典、古意,又佫是進步,反映時代兮現代性語言,伊會當形成意象,創造文學兮風氣;咱兮祖先自早着用父母話,來咧思考、創造兮文學。佇西元1566年,明朝嘉靖年間咱兮老祖先着已經創造南戲戲文《荔鏡記》兮劇本,搬演陳三五娘兮愛情故事;伊兮文學性誠懸,無輸三伯英台兮戲劇。唯西元1566年兮《荔鏡記》算起,夠北管兮文學、男女對唱兮七字仔褒歌、歌仔戲戲文、布袋戲戲文、皮影戲戲文、一仟三百外種兮歌仔簿,以及數目非常可觀兮民歌民謠、囡仔歌、囡仔古......。咱兮台語民間文學歷史超過四百冬,四百外冬兮民間文學會使講是源遠流長,波浪壯濶,一湧懸過一湧,非常兮澎湃,非常兮壯觀,值得來共伊吸收、繼承,發揚光大。
                 台語兮民間文學是台灣現代文學兮肥底南戲戲文歌仔簿是台灣戲劇小說兮源頭男女對唱兮七字仔褒歌是台灣歌詩現代詩兮水源今旦日台灣儂兮意識舉頭台灣兮詩人作家一夜之間雄雄睏精神逐家有疼心有愛心有毅力有決心卜來愛鄉愛土創造真正原汁兮台灣文學寫出有台灣水質台灣塗味有台灣主體性有血有目屎兮文學咱愛來食遮源頭兮活水吸收遮兮營養分來壯大家己咱一定愛回歸鄉土轉來祖先兮田園種作現在文學兮新品種咱兮台灣文學則有向望 
        台南縣立文化局,拔着頭彩,已經出版台灣第一套兮台語現代文學叢書,風起雲湧帶動台灣本土化兮熱潮;現在飲水思源,食果籽拜樹頭,佫卜來出版台灣兮民間文學:七字仔史詩─歌仔簿六本。互儂非常歡喜。杜甫兮詩:「不薄古人愛今人」講咧真好。咱文化局兮做法着是不薄古人愛今人兮充分表現;尊重現代亦疼惜古典,佇遮編者唯心肝底表示敬意佮感謝。即套冊兮出版是不朽兮「盛事」,希望對「台灣文藝兮復興」,有一定兮幫贈。
 
 
|內容試閱|

 
周成過台灣歌本事  (節錄)
 
/蔡玉仙/ 
 
        周成是泉州安溪縣三都能河村人氏,老父周溫是一个拳頭師父,干礁生周成即个孤囝爾爾,老母邀一个新婦仔月裡也,等周成大漢卜互速做堆。
        親情五十逐家風聲謗影,攏講台灣錢淹跤目,講甲互佇咧挲跤胴兮周成坐攏𣍐稠,一直卜去台灣。目一下,自某了也已經過一年矣。周成拜託老父共鬥寡錢互伊去台灣發展。尾仔周溫佮月裡也共厝邊隔壁借三千互伊去台灣。周成誠感謝月裡也兮支持佮諒解,月裡也勸翁婿佇外口着保重,共儂借兮錢一定愛想辦法緊還儂,恰𣍐拍歹咱兮信用,斬斷咱兮後路。周成講:即項代誌唔免汝交帶,有錢我一定會先寄轉來還;我無佇咧汝着愛恰有孝咧。月裡也雖然知影男兒立志出鄉關,唔佫想着翁婿家己一个儂卜去台灣實在誠唔甘。無外久周成卜出門矣,周成兮父母佮月裡也攏夠港墘來送,父母佮某講來講去攏是交帶伊身體愛保重、愛安份守己認真拍拚,上要緊兮是唔管趁濟趁少攏愛寄錢轉來厝裡。周成應講:我一定會拍拚趁錢,一定卜成功互恁好命。
        周成坐佇船頂,想着此去兮未來是一半歡喜一半驚;周成兮父母佮月裡也看船仔漸漸駛遠去,一个心肝是十个五个,下神託佛拜託神明鬥保佑;向望祖公仔有靈聖,會當互周成恰緊成功倒轉來。
        無外久,船佇淡水入港,看着海水白濛濛,周成來夠即个生頭唔捌分兮台灣,想着也是誠膽寒。一落船逐家着那像鳥獸分開、四散去矣,干礁周成一个漉搡漉搡徛佇遐唔知卜對哪位去。佇周成卜哭無目屎兮時陣,好嘉哉貴人現,拄着親堂周阿六,共伊去台北稅厝做生理。
        萬事起頭難,生理卜拍甲有一个底柢唔但三冬五冬,頭起先周成賣雜細做了無外好。後來周成兮生理漸漸有起色,煞愈舒路,汝兄我弟肖招着去開查某。
        尾矣去纏着趁食查某郭阿麵,迷甲死死暈暈無心卜趁錢。若干礁死坐活食,唔免講周成是雙手空空兮唐山客,着是有金山銀山兮大財主也無外久通拍鏟。周成開甲一箍溜溜,查某間兮大細攏看伊無目地。周成佫目珠毛無漿飲,敢店遐死豬鎮砧。老蔥兮叫儂共伊拖出去舂,拍甲周成哀父叫母喝救儂也無儂共同情。
        周成夆拍甲鮮尺仔鮮尺,愈想心愈凝,橫直身軀攏空空比水洗過兮佫恰清氣矣,規氣死死兮恰快活,伊走去河邊卜投江自殺。着佇周成卜跳落兮時,有一个儂共伊扭例,問伊是安怎想𣍐開卜揣死路?
        周成講:今無死𣍐埋得矣!我兮家賄攏互趁食查某郭阿麵揹去矣!有錢兮時好連好水,錢開了着唔捌咱矣。一仙五釐算甲真拄真,無錢通清着共我拍甲鮮鮮鮮。講起來也是我自作孽不可活,則會錢了佫無味,猶是死死兮恰歸氣!
        迄个儂講:若安爾咱着唔通想短路,為着婊仔來死會夆看衰。我佮汝平平是仝字運,我也是為着趁食查某阿甜也,錢共我揹咧做伊去,紲落佫講伊合我田無溝水無流。害我氣甲半小死,想卜來自殺。今咱着唔通夆看衰,我名做王根,算來咱也是有緣,不如咱結拜做兄弟互相來扶持。周成誠歡喜着合伊結拜。
        周成終仔合王根去兜,王根烏龍踅桌編一个故事來共老父撰撚轉:
                我兮店無張持火燒佫着賊偷,內面清甲有夠褿,無儂像我迹衰佋,互我愈想愈怨嘆,走去河邊卜自殺。是伊周成來救則無死,阮終仔結拜做兄弟。我安爾磕𣍐着卜去死實在是一个不肖兒。
                王根兮老父泰華講:錢了無底代有命留咧免悲觀,咱來台北開茶館。拄卜做事業、頭事是真濟,不如恩人汝也來鬥跤手,錢項恁唔免煩惱,本錢我會來伐落。

                莫怪儂講:在家靠父母,出外靠朋友。周成即擺死無去顛倒好康,一下着做大頭家。開店兮地點台北大稻埕真鬧熱,周成誠做生理,無外久周成兮茶行佇台北拚出字號。唔拘江山易改本性難移,周成一下有錢,錢蝨着咧齩,恰早兮症頭着佫咧夯,猶原念念不忘伊迄个郭阿麵。

                郭阿麵聽着茶行兮大頭家卜來贖身,佫卜皆轉去做夫人,笑甲喙仔裂西西;老蔥兮聽講聘金卜送萬一二,歡喜甲喙笑目笑,一直阿老周阿舍緣投佫才情;佫共周成討功勞:論恰真汝着愛感謝我,若無我兮牽成汝也無機會通做大頭家,汝合阿麵也嘛𣍐結局。周成迄个匏仔腦唔知咧想啥,煞一直揕頭共伊說多謝!互王根看甲花洒洒,想講周成若唔是互儂放符仔着是刁故意,無想早前互伊害甲卜投江,也敢佫伊入門種禍端。

        月裡也佇泉州看,翁婿從出門夠今攏無回無報,準做無錢通寄轉來,也愛報一下仔平安,厝裡兮儂也恰𣍐掛意。今後生出世已經四、五個月矣,也無帶加通知。周溫看後生安爾辜負儂,氣甲帶身命;佫再聽着親堂周阿六講周成佇台灣勢呱呱,錢濟甲無帶匟,佫再佇台灣一个趁食查某。氣一下終仔無命,周成兮老母看一下也無愛喘喟綴伊去。厝邊隔壁、親情五十攏來鬥跤手伐落喪事,大家、官扛上山了後,月裡也煞變成孤鳥駛孤帆。代誌拄着矣爛田也着準路,月裡也囡仔鞅咧坐船着來台灣揣周成。

                月裡也佇台灣那行那分那探聽,行甲衣衫藍縷親像乞食婆。有一日伊行夠一个鬧熱兮市仔口,那分那咧講夆聽,閒儂圍甲無縫,逐个聽着伊兮身世攏替伊目箍紅,想𣍐夠世間真正有即款兮梟雄翁。着佇眾儂一喙一舌咧問月裡也兮時陣,周成茶行兮薪勞──戇頭聽着伊講翁名做周成,佇朝陽街仔咧開茶行,走出來共伊。周成聽外口儂聲喊喝,着行出來看發生甚乜代誌,想𣍐夠伊一行出來,着互月裡也認着。月裡也大聲叫夫君,汝來台灣迹久攏無消息,爹娘今年拄過身...

        ...... 
 
  


gotop